LAOAG CITY – Maragragsakan dagiti kameng ti Burgos Salt Makers Association gapu ta addan ti boses da ken mabigbigbigen ti grupoda.
Inbunannag ni Mrs. Cheryll Ruguian, municipal agriculturist iti ili ti Burgos nga iti agdama ket adon ti maipapaay a tulong kadakuada manipud iti gobierno nasional ken iti gobierno probinsial.
Imbatadna a saan laengen a ti pasilidad a pagaramidanda ti asin ti naipaay kadakuada ngem uray pay dagiti dadduma a kasapulanda kas iti packaging ken dagiti dadduma pay a kagamitan a masapsapulda.
Inlawlawagna nga adda payen ti maipapaay kadagiti maseknan a panagsanay manipud iti no ania dagiti nasken a maaramid iti panagaramid ti asin agingga iti sabali a teknolohia a panagaramid ti asin kas iti Solar Salt Production.
Segun kenkuana, umabot iti tallopulo ket dua dagiti kameng ti Salt Makers Association iti ili a Burgos a benepisiario iti nasao a teknolohia.
Impalgak ni Ruguian a ti dakkel a paggidiatan ti asin a naaramid manipud iti Solar Facility ket environment friendly gapu ta saan nga agkasapulan ti kayo a kas iti “traditional” a wagas iti panagaramid ti asin nga adu ti kasapulan a kayo a pagluto ken manggubuay pay iti asuk.
Nupay kasta, kunana a napinpino ti asin a maluto no maidasig iti asin a naaramid iti “Solar Facility”.
