LAOAG CITY – Agtultuloy a birbiroken dagiti kameng ti PNP Solsona ti miembro ti CAFGU a nagpaputok ti paltog.
Binigbig ni Police Captain Chris Anthony Sorsano, chief of police ti PNP-Solsona ti CAFGU a ni Clevio Danao, agtawen ti 31, nasaawaan ken residente iti Barangay San Julian iti nasao nga ili.
Iti inisyal nga imbestigasyon ti PNP-Solsona, naginom ni Danao idi malem kalman, Setyembre 28 ket kabayatan ti panaginum na ket kellaat nagpaputok ti paltog a mabalin a gapo iti kinabartek.
Ngem nakita ti kapitan ti barangay ket inagaw na ti paltog a homemade 38 a paltog ken bulon metten ti suspek ti naglibas.
Naipaima kadagiti kameng ti PNP Solsoan ti nasao a paltog ken nakarekobre da iti maysa a basyo ti bala iti lugar.
Mainaig iti daytoy, kuna ni Sorsano a kumpletoen da laengen dagiti kasapulan a dokumento tapno maipila ti kaso kontra kenni Danao.
