LAOAG CITY – Manamnama a mangipila ti kaso ni Criminal Investigation and Detection Group (CIDG) Chief PBGen. Nicolas Torre III kadagiti nangpangta kenkuana ken kadagiti pulis idi kangitingitan ti manhunt operation ken ni Kingdom of Jesus Christ (KOJC) Leader Pastor Apollo Quiboloy.
Kaso a direct assault ti maipila a kaso kontra kadagiti miembro ti Kingdom of Jesus Christ members a nangpangta, nang-harass iti pamiliana, dagiti adda iti babaenna ken dagiti sumagmamano nga agirakrakurak kabayatan ti pannakaisayangkat ti dua a lawas a panangbirbirok iti televangelist.
Inbatad ni Torre, personal nga ipilana ti kaso gapu ta nagbalinen a personal ti panangatake kenkuana ken kadagiti padana a pulis.
Inpetteng ni Torre a maawatanna ti panangilaban dagiti miembro ti Kingdom of Jesus Christ ken ni Quiboloy ngem saan nga umiso nga iramanda ti pamiliada.
Iti kinapudnona, maysa kadagiti annakna ti nakaawat kadagiti hate messages iti online account-na.
Gapu iti daytoy, inbatad ni Torre a nasken nga agsaganan dagiti indibidual a nangaramid ti panangbutbuteng ken panangpangta gapu ta agtultuloy ti kaso.
