LAOAG CITY – Nagballigi dagiti kameng ti Provincial Drug Enforcement Unit (PDEU) iti inyuswat da a drug buy-bust operation iti Barangay 11 ditoy ciudad ti Laoag.
Nabigbig ti subject ti operasyon a ni Rommel Pablo, agtawen ti 42, miembro ti LGBTQ ken residente iti Barangay Loing iti ili ti Piddig.
Dagus a kinemmeg dagiti otoridad ti suspek kalpasan a naglako ti maysa a sachet a naglaon ti maipagarop a shabu nga agbalor ti sangaribo a pisos iti nagpammarang a poseur-buyer.
Nakaala pay dagiti otoridad iti bag na ti sangaribo a pisos a nausar iti operasyon, tallo a sachet a naglaon ti maipagarop a shabu, personal a kagamitan na ken ti cellphone na.
Segun iti Team leader ti PDEU a ni Police Senior Master Sergeant Marcelino Corpuz Jr., ni Pablo ket karaman iti Top 10 Drug Waltchlist iti PNP-Regional Office 1 ken maibilang a bigtime drug pusher iti region 1.
Innayon na a daytoyen ti maikalima a gundaway a natiliw ni Pablo gapu iti illegal a droga.
Ginandat ti Bombo Radyo Laoag nga alaen ti kabibiangan ti suspek ngem nagkedked daytoy a nagsarita.
