LAOAG CITY – Balligi ti naiyuswat a gun buy bust operation a nakatiliwan ti maysa a miembro ti New Peoples Army (NPA) iti ili ti Paoay.
Binigbig ni Police Lt. Jackson Sugayen, team leader ti Provincial Drug Enforcement Unity (PDUE) ti subject ti operasyon a ni Dennis Patong, agtawen ti 32, tubo iti Digos City, Davao del Sur ngem agdama nga agnanaed iti ili ti Paoay.
Ummuna iti daytoy, kuna ni Sugayen a bayat nga agin-inom ni Patong ken ti informante da ket inpakita ti maseknan ti paltog na a caliber 357 ken ilaklako na iti lima ribo a pisos.
Gapo iti daytoy, dagus a naireport kadakuada ken nakikoordenar da iti PNP-Paoay para iti pannakaiyuswat ti operasyon.
Nakumpiskar iti operasyon ti nasao a paltog, lima a sachet a naglaon ti maipagarop nga iligal a droga a nakaipan iti brown sling bag nga agdagsen ti lima a gramo ken addaan ti street value nga 50 a ribo a pisos.
Kuna ni Sugayen a ni Patong ket miembro iti kabarbaro a drug group nga agop-operar ditoy probinsya.
Naamoan pay a ni Patong ken ti natiliw met laeng iti iligal a droga idi Sabado, Hulyo 17 ket agkagrupo.
Kabayatanna, kinumpirmaran ni Sugayen nga Aktibo a miembro ti New Peoples Army ni Patong partikular iti Davao del Sur Command iti panangidaulo ni Commander Noynoy no sadinno a nakikappeng idi 2018 ken idi 2010 ket naglibas daytoy ken immay naglemmeng ditoy probinsya.
