LAOAG CITY – Rinugianen nga ipa-deport dagiti nakabalod a migrants manipud idiay Amerika a nakalugan iti United States military C-17 aircraft maiyallubog iti pammilin ni United States President Donald Trump.
Naikabil ti sag-80 a migrants a nakalugan iti dua nga United States military aircraft nga agturong iti Guatemala basar iti maysa nga United States official.
Inrakurak ti United States State Department a committed ti Guatemala ken Estados Unidos a maisardengen ti illegal migration ken panangpapigsa pay ti border security.
Naammoan a kadagiti napalabas a gundaway, inusar met ti nasao nga United States military aircraft iti panang-relocate kadagiti indibidual manipud iti maysa a pagilian nga agturong kadagiti dadduma a pagilian kas idi ag-withdraw ti Estados Unidos manipud iti Afghanistan idi 2021.
Daytoy ti umuna a gundaway nga inusar ti United States military aircraft iti panangipatulod dagiti migrants a rummuar iti Estados Unidos.
Maipalagip nga iti umuna nga aldaw a panagtugaw pay laeng ni Trump iti puesto, indeklarana ti illegal immigration kas national emergency ken inbilinna ti United States military a nanayonan ti border security, pannakaipatungpal ti naiget a ban wenno pannakaipawil iti panangipaay ti asylum ken restriksion iti citizenship dagiti ubbing a naipasngay idiay Amerika.
