LAOAG CITY – Kinumpirmaran ti militar ti Estados Unidos a dinadaelda dagiti uppat a drone ken dua nga anti-ship ballistic missiles kadagiti rehion ti Yemen a kontrolado dagiti rebelde a Houthi a supsuportaran ti Iran.
Ti air strike nga inwayat ti Estados Unidos ket gapu pay laeng ti agtultuloy a panangraut dagiti Houthi kadagiti barko a dakdakamaten ti rebelde a grupo nga adda pakainaiganna iti Israel, partikular dagiti aglaylayag iti Red Sea ken Gulf of Aden sipud pay idi Nobiembre idi napan a tawen.
Ti tignay dagiti rebelde a Houthi ket makuna a kadagiti wagas ti panagkaykaysa dagiti kaalyadoda a Hamas a mangsango iti opensiba ti Israel iti Gaza strip.
Kabayatanna, sibaballigi met a dinadael dagiti puersa ti United States Central Command (USCENTCOM) dagiti uppat nga Unmanned Aircraft Systems (UASs) ken dua nga Anti-Ship Ballistic Missiles (ASBMs) kadagiti lugar a kontrolado dagiti Houthi iti Yemen.
Mainaig iti daytoy ket linapped pay dagiti puersa ti Amerika dagiti unmanned aircraft systems a naiwayat manipud iti lugar a kontrolado dagiti Houthi idiay Bab al-Mandab Strait ken dinadaelda pay ti patrol boat dagiti rebelde a Houthi.
Iti laksid ti panangipalladaw ti Houthos iti 4 nga anti-ship ballistic missiles iti Red Sea iti napalabas a 24 nga oras, kinuna ti United States military command nga awan ti naipadamag a nasugatan wenno nadadael.
