LAOAG CITY – Inpakaammu ti militar ti Israel a narekobreda dagiti bangkay dagiti lima nga Israel citizen a nahostage pay laeng bayat ti panangraut ti Hamas iti southern Israel Israel idi Oktubre 7 idi napan a tawen.
Nasarakan ti bangkay da Maya Goren maysa a kindergarten teacher ken dagiti soldado a da Major Ravid Aryeh Katz, Master Sergeant Oren Goldin, Staff Sergeant Tomer Ahimas ken Sergeant Kiril Brodski bayat ti operasion iti lugar ti Khan Younis.
Kinuna ti militar a mabalin a napapatay ni Goren iti pannaka-hostage na, bayat a dagiti soldado ket napapatay idi Oktubre 7 kabayatan ti gubat.
Mainaig iti daytoy, inyanunsyo ti Israel military nga adda pay 111 kadagiti 251 a tattao a hostage ti nakabalud pay laeng idiay Gaza, agraman ti 39 a maipagarup a natay.
Maipalagip nga idi laeng napalabas nga aldaw, binigbig ni Israeli Prime Minister Benjamin Netanyahu ti gasat dagiti hostage iti panagbitlana iti Kongreso ti Estados Unidos ngem awan ti inbatadna no umannamongdan iti katulagan seknan iti ceasefire iti Hamas tapno masigurado ti pannakawaya-wayada dagiti balud .
