LAOAG CITY – Im-imbestigaren ti military government idiay Mali ti alegasyon nga adda ti pinatay dagiti soldado a 24 a sibilyan iti amyanan a paset ti pagilian.
Daytoy ti inbatad ni Army chief Gen Oumar Diarra iti Mali.
Ti alegasyon ket inrakurak ti separatist Tuareg rebel alliance a naawagan ti Azawad Liberation Front (FLA), a makilablaban iti gobierno ti Mali iti nasao metlaeng a rehiyon.
Inakusan ti Azawad Liberation Front ti Malian forces ken Wagner mercenaries iti panangsaed da ti dua a pampasahero a behikulo nga agturong iti Algeria manipod iti ciudad ti Gao idiay Mali, ken pinatay da dagiti nakalugan a sibilyan, a pakairaman ket ubbing ken babbai.
Maipalagip a ti military ti mangiturturay iti Mali sipud ti napasamak a kudeta idi 2020, ken idi 2021 ket nangala da ti Russian mercenaries manipod iti paramilitary group Wagner tapno tumulong a mangipatalged ti seguridad iti nadakamat a pagilian.
Nupay kasta, agpada ti government forces ken dagiti Russians a masansan a maak-akusaran babaen ti rights groups gapu iti maipagarop a panangipatungpal da ti gross human rights abuses kontra kadagiti sibilyan, banag a naglikudan met dagitoy.
