LAOAG CITY – Nasuspenso ti National Basketball Association (NBA) forward ti Milwaukee Bucks a ni Bobby Portis gapu iti maipagarup a panaglabsing iti anti-drug policy ti liga.
Pinawilan ti NBA a makaay-ayam ni Portis iti uneg ti 25 a games. Kayatna saoen, saanen a makaay-ayam ti 2021 NBA champion iti nabatbati a paset ti 2024-2025 regular season.
Basar iti liga, nagpositibo ni Portis iti tramadol, maysa a klase ti agas a maus-usar para iti severe pain ngem saan nga aprobado nga usaren dagiti player ti liga.
Segun iti kampo ni Portis, nagbiddot laeng ti Bucks forward iti ininomna nga agas.
Inbatad ni Mark Bartelstein, ti agserserbi a pannakabagi ni Portis, inpagarup ti basketbolista a ti ininomna nga agas ket Toradol, maysa a pain medication nga aprobado iti NBA.
Iti baet daytoy, nagdesision ti kampo ni Portis a saanen nga agapela iti desision ti NBA.
Gapu iti 25-game suspension, makissayan ti sueldo ni Portis ti $2.85 million.
Iti agdama, adda iti maikalima a puesto ti Bucks iti Eastern Conference nga addaan ti 29-24 win-loss record.
