LAOAG CITY – Inbatad ni Police Capt. Julius Basallo, ti chief of police iti ili ti Bangui nga adda ti maysa a minibus nga addaan ti rota a Laoag-Pagudpud a dandani natennag iti derraas iti paset ti Barangay Baruyen iti nasao nga ili.
Inbaga ni Basallo a ti nasao a bus ket napukawan ti preno isut gapuna nga indungpar ti driver iti nabunton a daga nga asideg iti derraas.
Segun ti opisyal, ti bus ket addaan ti 13 a pasahero no sadinno a maysa kadagitoy ket nagsakit ti tumeng na isut gapuna a naitaray iti Bangui District Hospital.
Innayon ni Basallo a nagasat gapu ta awan ti sabali a nairaman iti napasamak a desgrasya.
