LAOAG CITY – Nangipatungpal kadagiti tignay-protesta iti amin a 50 nga estado ti Amerika ti minilyon nga indibidual tapno ipanawagan ti panangkontra da iti administrasyon ni Presidente Donald Trump.
Nagkaykaysa dagiti protesters a nagpanawagan nga awan ti rumbeng nga agari iti Estados Unidos.
Karaman kadagiti nakipaset ken nagsarita kadagiti naiyuswat a tignay-protesta ket ti sumagmamano a pulitiko, kas kada Democratic Senators Chuck Schumer, Chris Murphy, ken Cory Booker.
Nabara nga inawat ni Senator Bernie Sanders ti napipigsa a palakpak ken panagdidir-i dagiti tattao iti iyuuli na iti entablado tapno agsarita iti rally iti Washington D.C.
Manamnama a minilyon ti nakipaset pay iti 2,700 a lokasyon manipod iti babassit nga ili agingga iti dadakkel a ciudad a mangipasimudaag ti nalawlawa ken desentralisado a tignay-protesta kontra ken ni Trump, nga idi damo ket nakatutuk laeng kadagiti demonstrasyon iti Washington D.C. iti umuna a termino na kas presidente ti Amerika.
