LAOAG CITY – Manamnama nga iti katengngaan ti Hulio ket posible a ngumato ti minimum wage dagiti mangmangged iti National Capital Region.
Inbatad ni Department of Labor and Employment Secretary Bienvenido Laguesma a posible a mairuar ti baro a pammilin sakbay ti anibersario ti kaudian a wage order inton Hulio.
Kunana a maibasar iti pakasaritaan, ap-aprobaran ti Regional Tripartite Wages and Productivity Board ti panagngato iti sueldo kalpasan ti deliberasion.
Inlawlawagna a rinugian ti Regional Tripartite Wages and Productivity Board iti National Capital Region ti proseso idi Mayo kagiddan metten ti direktiba ni Presidente Ferdinand Marcos Jr. nupay awan pay ti petision para iti wage hike.
Nupay kasta, iti kallabes ket maysa a pormal a petision ti inpila dagiti labor groups nga agkidkiddaw ti P500 a panagngato ti daily wage dagiti mangmangged iti National Capital Region.
Naammoan nga iti agdama ket adda ti daily minimum wage rate iti National Capital Region a P610.
