LAOAG CITY – Naiget a naglikudan ni Mrs. Maricris Cabasa ti alegasion kontra iti asawana a ni Mr. Ruel Cabasa, padana a mangisursuro iti Pandan Integrated School iti ili ti Sarrat.
Daytoy ket kalpasan nga adda ti dimmanon a reklamo iti Bombo Radyo Laoag a maipagarup a masansan ti panaginom ken panagliwayna a mapan agisuro kadagiti agad-adal.
Segun ken ni Mrs. Cabasa, saan a sumsumrek a nabartek iti klase ti asawana ngem no adda man ti gundaway nga arig nakainom daytoy ket hang over laeng isuna.
Inbatadna nga awan dagiti reklamo dagiti estudiante ti asawana ken awan met ti naidanon a reklamo ken ni Mrs. Angelina Peralta, ti Prinsipal iti nasao a pagadalan.
Mainaig iti daytoy, inpakaammo ni Atty. Donato Balderas, ti Schools Division Superintendent ti Department of Education – Ilocos Norte nga awan met pay ti naaw-awatda a report pakaseknan iti nasao a banag.
Nupay kasta, kunana mangisayangkatda ti imbestigasion tapno maammoan no ania ti kinapudnona iti maibatbato nga alegasion kontra iti maseknan a mangisursuro.
Kabayatanna, bayat a maisursurat daytoy a damag ket nakumpirmaran ti Bombo News Team a saan a simrek ni Mr. Cabasa iti pagadalan ita nga aldaw gapu ta maipagarup a nakainom daytoy.
