LAOAG CITY- Naballigi ti pannakaangay ti Miss Ilocos Norte 2024, maysa a prestihioso a pageant a nakaurnongan dagiti kandidato manipud iti 23 a munisipyo ti Ilocos Norte tapno maipakita ti kinapintas, talento, ken kinalaingda kas maysa nga Ilokana.
Nagun-od ni Miss Solsona ti korana a Miss Ilocos Norte 2024 a balligi a naiyuswat iti aldaw ti Domingo Mayo 18, iti Centennial Arena ditoy probinsia.
Mainaig iti daytoy ket nagun-od ni Miss Pagudpud ti 1st runner up a puesto, Miss Dingras ti 2nd runner up, Miss Batac para iti 3rd Runner up ken ni Miss Vintar iti nakagun-od ti 4th runner up.
Inbitla ni Vice Governor Cecilia Anareta Marcos ti panagyamanna kadagiti amin a nabalin a paset ti nasao a pageant.
Segun met ken ni Governor Matthew Marcos Manotoc saan laeng a ti kinapintas ti ipakpakita dagiti kandidata ti Miss Ilocos Norte no di pay ket ti naimbag a nakem, panagkaykaysa, ken panagdur-as iti probinsa.
Innayonna a ti Miss Ilocos Norte ket maysa kadagiti best pageant iti pagilian a pakaitampokan ti disiplina, panagregget, ken talento dagiti kandidato nangruna kadagiti Ilocana.
Nupay kasta nagserbi a Chairman ti board of Judges ti Miss World 2013 a ni Megan Young, idinto a ni Mikael Daez ti nagbalin a host iti nasao a pageant.
Kabayatanna, ti Miss Ilocos Norte ket kas paset ti panagselebrar ti La Milagrosa Festival a nangipakita iti talento ken kinapintas dagiti umili nga Ilocana.
Maipalagip a ti question a naited a kadagiti kandidata a manipud kenni Miss World 2013 Megan Young ket addan ti question nga iti kultura ti Ilocano ti virtue ti pannakipagrikna wenno empathy ket alisto a nagbalin a napateg nga aspeto iti management, negosio ken disenio, kasano nga maipakaita ken maisuro ti pannakipagrikna kadagiti agtutubo nga Ilocano no sadinno a ti sumbat ni Miss Solsona Angeline Caraang ket tapnu mapabileg dagiti agtutubo ditoy probinsia babaen iti pannakipagrikna.
