LAOAG CITY – Inpakaammo ni Atty. Charito Malicad, ti City Tourism Officer ditoy ciudad ti Laoag a mabaliwan ti pakaiwayatan ti Miss Laoag 2025.
Segun kenkuana, ti orihinal a pakaiwayatan koma ti Miss Laoag 2025 ket iti centennial arena ngem maiyakar daytoy iti aurora park.
Inlawlawag ni Malicad nga adda ti maysa nga empleado manipod iti kapitolyo probinsyal a nakisarita kadakuada a mausar ti centennial arena intono Pebrero 11 para iti panagkampanya ni Presidente Ferdinand Marcos Jr. kadwa na dagiti senador a suportaran na.
Inpakaammo ni Malicad nga immunan nga inaprubaran ti gobernador ti kiddaw ti gobierno lokal ditoy ciudad nga usaren da ti centennial arena manipod Pebrero 3 agingga iti 7 ken Pebrero 9 agingga iti 13 para iti Miss Laoag.
Inadmitir ni Malicad a maladingitan da iti pannakaiyakar ti venue para iti Miss Laoag gapu ta idi paylaeng Pebrero 3 a rinugyan da iti panagaramid iti stage ngem gapo ta mausar ti presidente ket masapol nga iyakar da iti Aurora Park.
Innayon na a napinpintas koma no nasapsapa a naipakaammo kadakuada tapno saan da a rinugyan ti nagipatakder iti stage.
Nupay kasta, inpalgak na nga awan ti maaramidan da no saan a ti agtungpal iti kiddaw iti gobierno probinsyal tapno maliklikan ti isyu ken problema.
