LAOAG CITY – Nakaronaan kas Miss Ilocos Norte 2022 ni Miss Laoag City Keith Alawag iti kalepleppas a Coronation night idi rabii iti Centenial Arena ditoy siudad ti Laoag.
Kinalaban ni Miss Laoag para iti korona ni Miss Dingras Sophia Guillermo nga isu ti 1st Runner-up iti nasao a pageant.
Kabayatanna, dagiti sabali pay a simrek iti top ket ni Miss Sarrat Fhebe Kate Ballesteros nga isu ti 2nd Runner-Up, 3rd Runner-up Miss Batac Alliah Gwyn Romero ken ti 4th Runner-Up a ni Miss Pinili Marianne Abigail Pagdilao.
Maymaysa ti nagbalin a saludsod kadagiti Top 5 Finalist ken daytoy ket nu aniaman ti saan da a mapukaw iti panagbiag kas maysa nga Ilocano nu bilang adda ti gundaway dagitoy nga agtalinaed iti sabali a pagilian.
Arig nga agpapada ti insungbat dagiti kandita a dagiti Ilocona ti saanda a malipatan ken narigat a pukawen iti panagbiag na nu adda da iti sabali a nasyon.
Nu pay kasta, pimmatok ti sungbat ni Miss Laoag kadagiti judges ken tattao ken isu ti nangitunda iti pannakaiyalat na ti korona.
Kabayatanna, sakbay a napili dagiti Top 5 finalist ket simrek iti top 15 nga dagiti kandidata iti ili ti Burgos, Currimao, Solsona, Badoc, Bangui, Banna, Batac City, Dingras, Laoag City, Pasuquin, Pinili, Sarrat ken Vintar.
Ti coronation night ti Miss Ilocos Norte ita a tawen ket naiyuswat nga addaan ti live audience ken adda pay ti naipabuya a babaen iti facebook live.
