LAOAG CITY – Nadutukan ni Miss Pia Shey Abaya kas baro nga assistant manager ti Public Employment and Services Office (PESO) iti gobierno lokal ditoy ciudad ti Laoag.
Aminado ni Abaya a ti pannakadutuk na para iti nasao a posisyon ket dakkel a responsibilidad a sangwen na wenno naipabaklay kenkuana.
Nupay kasta, inkari ni Abaya nga aramiden na amin a kabaelan na tapno maaramid ken maannung na a naimbag dagiti trabaho na a pagsayaatan dagiti residente ditoy ciudad ti Laoag.
Innayon na a babaen iti liderato na ket agbalin met a baro ti vision ti Public Employment and Services Office ditoy ciudad a “Maikalikagoman, Makapagtrabaho, Kailian”.
Mainaig iti daytoy, kuna pay ni Abaya a dakkel a tulong kenkuana iti baro a posisyon na dagiti nagbalin a kapadasan na iti panangipaay ti serbisyo iti publiko.
Iti agdama, inpakaammo ni Abaya a makumikum ti opisina na nga agisagsagana kadagiti nagduduma a proyekto ken aktibidad a makatulong kadagiti residente ditoy ciudad kangrunaan na dagiti agbirbiruk ti trabaho.
