LAOAG CITY – Inpakaammo ni Miss Vicka Guzman ti Secretary ni Dr. Maria Lourdes Otayza, Medical Chief II ti Mariano Marcos Memorial Hospital and Medical Center iti Siudad ti Batac nga agkurkurangda kadagiti essential materials a kangrunaan a kasapulan iti pananglaban kontra ti COVID-19.
Segun kenkuana, dagiti ramit a masapol iti Molecular Laboratory ket ti reagents ken plastic consumables para iti automated nucleic acid extraction machine wenno ti King Fisher Flex-96 pakairamanan ti RNA Binding Solution, Wash Solutions, Magnetic Beads, Proteinase K, Elution Buffer.
Inbatadna a masapolda pay ti consumable for automated RNA extraction-Deep well plates, polypropylene, 50 pieces iti kada box wenno ad-adu pay ken compatible with existing MBL automated RNA extraction machine.
Malaksid kadagiti naibaga a ramit ket agkurkurang pay ti gloves, surgical ken N95 respirator a masansan nga us-usaren dagiti health care workers.
Mainaig iti daytoy, kunana a dagitoy met dagiti medical equipments a kasapulan ti COVID-19 Operations nangruna iti Management kadagiti in-patients kas iti coverall, facemask, n95, kn95 ken dadduma pay.
Kabayatanna, kiniddaw ni Gob. Matthew Marcos Manotoc ti panagkaykaysa iti panangtulong iti maibilang a COVID-19 Hospital ditoy Ilocos Norte para kadagiti masapolda a kagamitan.
