LAOAG CITY – Inbatad ni Doctor Gretchen Ranada, ti Vaccination Chief Head iti Mariano Marcos Memorial Hospital and Medical Center iti ciudad ti Batac nga agsobsobran ti covid-19 vaccine iti nasao nga ospital.
Gapu iti daytoy, gutgutiguten na dagiti saan pay a nagbakuna kontra iti covid-19 a mapan da laeng iti nasoa nga ospital.
Inlawlawag na a nakaibakuna dan ti 2,000 doses iti first dose para kadagiti agtawen ti 5 agingga iti 11 idinto a 500 doses iti 2nd dose iti isu metlaeng nga age group.
Kuna na nga iti agdama ket adda pay ti nabati a 1,500 doses no sadinno ket ibakuna da daytoy iti umay a lawas iti covered court iti Mariano Marcos State University (MMSU) iti ciudad ti Batac.
Maragsakan ni Ranada gapu ta awan ti naobserbaran da a serious wenno adverse effect kadagiti nabakunaan.
Inpanakkel pay ni Dra. Ranada a naartapanen ti Mariano Marcos Memorial Hospital and Medical Center ti 100 a porsiento a vaccination coverage ti nasao nga ospital.
Mainaig iti daytoy, kuna na a tapno ad-ado pay dagiti magutigot a mapan agpabakuna ket nangidiaya da ti libre a coupons para iti libre a dental check-up ken 20% discount para iti specific dental procedures nga agngudo ita nga aldaw, Marso 12.
