LAOAG CITY – Inpakaammo ni Senior Board Member ken Chairman ti Committee on Health and Sanitation Dr. Medeldorf Gaoat a manayunan ti 400 a bed capacity ti Mariano Marcos Memorial Hospital and Medical Center iti siudad ti Batac.
Segun kenkuana, daytoy ket babaen iti pannakaipasdek ti 10-storey a Saints Nicholas and Peregrine South Wing Pediatric, Oncology and Multi-Specialty Building Phase I agingga iti Phase III ti nasao nga ospital.
Gapu iti daytoy, kuna na a manipod iti 300 a bed capacity ti ospital ket mapagbalin a 700 bed capacity.
Inbatadna a dakkel a tulong daytoy tapno ad-ado ti maakomodar ti ospital a pasyente ditoy probinsya wenno dagiti aggapo iti sabali a lugar.
Malaksid iti daytoy, kunana a manamnama nga adda pay ti maiestablisar nga Oncology ken Dermatology Center kasta pay nga adda ti maipasdek a Cancer Center tapno saanen a kasapulan a rumuar ditoy probinsia tapno mapan agpaagas idiay Manila.
Inlawlawagna nga adda pay dagiti dadduma a naikari a maipatakder iti ospital para iti pannakapasayaat ken pannakapapintas iti panangipadanon ti serbisio medikal.
Immuna iti daytoy, inpakaammo ni Presiding Officer Bise Gob. Cecilia Araneta Marcos nga adda ti maputar a resolusion tapno maituloy a mapundoan ti nasao a proyekto ti ospital babaen iti gobierno Nasional.
Manamnama ti pannakaileppas ti pannakaipasdek ti proyekto inton tawen 2025.
