LAOAG CITY – Nagpalagip ti Mariano Marcos Memorial Hospital and Medical Center iti Siudad ti Batac kadagiti public health care workers pakaseknan iti electioneering wenno pannakipagpaset iti panagkampanya.
Segun ken ni Mr. Jhey-ar Mangati ti Health Education ken Promotions Officer ti nasao nga ospital, daytoy ket kalpasan a nangiparuk-at ti statement ti Department of Health mainaig iti maipagarup a panagatendar dagiti empleado ti DOH kadagiti election campaign rallies banag a dagus a pinalagipan ti Ilocos Center for Health Development Region I dagiti maseknan nga empleado.
Inbatadna a maibasar iti initial reports a naipatulod iti Regional Office ket saan a DOH employees dagitoy no di ket dagiti Barangay Health Workers pakairamanan dagiti volunteers a nagatendar iti maysa nga election campaign rallies.
Inlawlawagna a naipalaon iti Civil Service Commission Resolution No. 1600298 a ti panangipawil kadagiti DOH employees ket tapno maipasigurado nga amin a government workers ket agtalinaed a nakapokus kadagiti trabaho da ken maliklikan ti spoils system pakairamanan ti shield public service manipod iti political influences.
No pay kasta, basar iti Section 124 ti Omnibus Rules on Appointments and Other Human Resource Actions, mabalin a mapalubusan dagiti government workers iti makipagpartisipar iti political ken electoral activities ngem saanda a mabalin ti agaramid ti solicit contributions.
Kunana nga iti met CSC Memorandum Circular No. 9, Series of 1992 ket nakailanad a maipawil dagiti sumaganad a banag;
Ti pannakausar dagiti lugan ti Gobierno iti panagatendar ti political conferences, meetings, rallies ken parades.
Ti panangikabil ken panangibunong kadagiti campaign materials, leaflets, banners ken stickers.
Ken ti panagisuot ti t-shirts, pins, kallugong ken dadduma pay nga election paraphernalia nga adda ti nagan dagiti kandidato ken political party malaksid laeng no adda ti pammalubos manipod iti Commission on Elections wenno COMELEC.
