LAOAG CITY – Nangipaay ti palawag iti Mariano Marcos Memorial Hospital and Medical Center iti ciudad ti Batac iti immunan a nagbalin a rakurak ni Senator Imee Marcos kabayatan ti ibibisitana iti nasao nga ospital idi nangiwayat daytoy ti free dialysis kas paset ti selebrasyon ti panagkasangay ti ama na.
Segun ken ni Dr Jose Orosa III, Chairman iti office for strategy management chief of medical professional services, ado iti agdama a maiwaywayat a construction activity iti nasao a balay pag-agasan.
Kunana a paset daytoy iti pannakapinta iti dadduma a paset ti ospital no sadinno nga adda dagiti saan a maliklikan a panagtedted ti pinta iti datar a rason iti panangikabilda kadagiti kayo a mangsarapa kadagitoy.
Innayonna nga adda dagiti mula a saan pay a naiplastar gapu ta saan pay a mabalin a maimula dagitoy kabayatan a saan pay a nalpas ti construction.
Inpakaamona nga adda ti inaramidda nga alternative walkway manipud iti emergency room, rason no apay nga adda dagiti wirings a nakawara apaman a bimmisita ti senadora.
Inrakurak ni Dr. Orosa nga apaman a dimmanon kenyada daytoy a banag ket insigidada a nagplano no ania dagiti aramidenda nga addang.
Kabayatanna, inpanamnamana nga aramiden amin dagiti kameng ti Mariano Marcos Memorial Hospital and Medical Center ti kabaelanda tapno maitultuloy a mapapintas ti imahe ti ospital nangruna pakaseknan ti kinadalos.
Maipalagip nga immunan nga inpalgak ni Sen. Imee Marcos a dandanin a nagwala apaman a bimmisita ti nasao nga ospital gapo iti naimatanganna a kinarugit daytoy.
