LAOAG CITY – Nagun-od ti 100 a porsiento ti Mariano Marcos State University – College of Agriculture, Food and Sustainable Development ti October 2024 Forester Licensure Examination.
Segun ken ni Dr. Charles Batin, Dean ti College of Agriculture, Food and Sustainable Development, daytoy ket kalpasan a nakapasa amin dagiti 16 a board takers no sadinno a 15 kadakuada ket first-time takers idinto a ti maysa ket retaker.
Inbatadna nga iti umuna ken maikadua a semestre dagiti 4th year students ket dumaldalan dagitoyen iti panagrebyu kas panagsagsaganada para iti board examination.
Kunana a malaksid iti daytoy ket mangididiayada pay ti supplemental review apaman a malpas dagiti estudiante ti formal review session.
Mainaig iti daytoy, inlawlawag ni Mr. Jasper Ian Fernandez, maysa kadagiti nakapasa iti kalepleppas nga October 2024 Forester Licensure Examination a saan a nagbalin a nalaka ti nagbalin a pannubokna kabayatan ti panagrebyuna gapu ta iragragpinna ti panagrebyuna iti parbangon nga isu laeng ti oras a nawayana isuna.
Inpakaammona a saanna a mailibak nga adda dagiti gundaway a napukawan ti namnama nangruna ket makumikom isuna iti trabahona ken dagiti responsibilidadna kas maysa nga ama.
Nupay kasta, kunana nga inusarna nga inspirasion ti pammagbaga ti pamiliana ken ti naiget a panagkararag iti Dios.
Kabayatanna, naammoan a naiyuswat ti eksaminasionda iti uneg ti dua nga aldaw idiay Baguio City.
