LAOAG CITY – Naglikudan ni Prof. Emil James Tanagon, Director ti Office of the Student Affairs ti Mariano Marcos State University nga isalsalakanda ti maysa a mangisursuro a ni Dr. James Zandro Ventura a sumangsango kadagiti adu a reklamo manipud kadagiti estudiante.
Segun kenkuana, alaenda pay laeng ti amin nga impormasion para iti naan-anay a pannakaiwayat ti imbestigasion.
Inbatadna a ti Office of the Student Affairs ket opisina para kadagiti estudiante isu a rumbeng laeng nga adda ti tignay nga aramidenda tapno masolbar ti nasao nga isyu.
Inlawlawagna a kalikagumda nga agbalin a natalged dagiti amin nga estudiante iti pagadalanda isu a masapul a naiget daytoy a maimbestigar tapno awanen ti tumaod a sabali pay a problema.
Maipalagip nga adda dagiti sumagmamano nga estudiante ti nag-post iti social media maipanggep iti maipagarup a panang-bully, panangibabain ken pannakapasar dagitoy ti sexual harassment babaen ken ni Dr. Ventura.
Kabayatanna, inpasingked ti Mariano Marcos State University nga insigida a tratarenda ti nasao nga isyu dagiti estudiante ken maipatungpal ti maiyannatop a pagannurotan.
Immuna iti daytoy, personal a nagturong ti Bombo Radyo Laoag News Team iti nasao a pagadalan tapno alaen ti takder wenno komento ni Dr. Ventura maipanggep iti daytoy ngem saan daytoy a nagpakpakita.
