LAOAG CITY – Nakaawat ti bomb threat ti Mariano Marcos State University iti siudad ti Batac.
Daytoy ket babaen iti naipatulod a mensahe manipud iti maysa a facebook account nga agnagan ti “Dumper Chlo.”
Gapu iti daytoy, dagus a nagbakwit dagiti amin nga estudiante ken mangisursuro para iti kinatalged dagitoy.
Naiyakar ti klase dagiti estudiante babaen iti asynchronous mode idinto a dagiti empleado ket ag-work from home.
Basar iti naawat a mensahe ket nailanad nga adda ti maipagarup a 11 a naimula a bomba iti aglawlaw iti College of Health Sciences grounds no sadinno a rumrummuar nga adda ti pito a naikabil iti Pharmacy ken Nursing Deparment idinto nga uppat met iti mapapati a naimula a bomba iti Physical Therapy Deparment.
Nadakamat pay iti mensahe a saan a daytoy a “prank,” “Marcos magnanakaw” ken no adda ti nasken a pabasolen ket dagiti Marcoses.
Naammoan a posible a bumtak dagiti naimula a bomba iti eksakto 1:30 ti malem.
Mainaig iti daytoy, segun ken ni Dianne Calantoc, estudiante ti Mariano Marcos State University nga apaman a nakaawatda ti mensahe nga adda ti bomb threat ket dagus dagitoy a nag-panic no sadinno a nabilin dagitoy a rummuar iti unibersidad ken agawiden.
Kabayatanna, inpasingked ni Dr. Virgilio Julius Manzano, Officer In Charge nga ad-adda pay a mapaigetan ti pannakaipatungpal ti security protocol no sadinno a mangaramidda ti pagannurotan tapno saanen a maulit pay ti napasamak nga insidente.
Iti agdama, kabayatan a maisursurat daytoy a damag ket negatibo wenno awan ti nasarakan a bomba iti uneg ti unibersidad babaen iti nagtitipon a puersa ti Batac City Police Station, Ilocos Norte Police Provincial Office, Special Weapons and Tactics ken dadduma pay.
