LAOAG CITY – Nakaawat ti Mariano Marcos State University ti dua a formal complaint mainaig iti reklamo kontra iti maysa a mangisursuro ti nasao a pagadalan a ni Dr. James Zandro Ventura III.
Daytoy ti kinumpirmaran ni Dr. Fides Bernardo Bitanga, Vice President for Administration, Finance & Business.
Inbatadna a dagitoy a dua a surat ket manipud iti College of Teacher Education a naawat ti Office of the President idi malem kalman, Hunio 3.
Kunana a nangipasa pay ti official report ti College Dean, Guidance Counselor ken Student Regent ken leaders kenkuana.
Inlawlawagna a basar kadagitoy a naawatna a surat ket mangaramid ti report ken ipasana iti opisina ti MMSU President a ni Dr. Julius Manzano Jr.
Mainaig iti daytoy, saan met a sinungbatan ni Dr. Bitanga ti saludsod ti Bombo Radyo Laoag News Team maipanggep iti posible a pannakasuspenso ni Ventura sakbay ti imbestigasion.
Maipalagip nga inrakurak ti nasao nga opisial ti unibersidad a babaen ti formal complaint ket maipaayanda ti gundaway nga idalan ti legal a proseso ti nasao a reklamo kas maiyannatop ti protocol ti MMSU.
Inpettengna a ti panangiwayatda ti imbestigasion ket awan ti kanunonganda ken tratarenda ti reklamo a naimbag.
Innayonna nga aramidenda ti amin a kabaelanda tapno maliklikan a maulit dagitoy a pasamak iti uneg ti unibersidad.
Immuna iti daytoy, adda dagiti sumagmamano nga estudiante ti nag-post iti social media maipanggep iti maipagarup a panang-bully, panangibabain ken pannakapasar dagitoy ti sexual harassment babaen ken ni Dr. Ventura.
