LAOAG CITY – Nakagun-od ti balitok a medalya ti Mariano Marcos State University – College of Computing and Information Sciences iti maikawalo a Global Competition on Design for Future Education Finals idiay China.
Inprisentar da Marc Joseph Sacopaso, Kurt Angelo Agcaoili, Angelo Laurence Palting ken Meljan Christoffer Crisostomo ti proyektoda a napauloan ti “YOURTWIN – A Digital Clone for Cognitive Growth.”
Kadua ti grupo ti mentor-da a ni Dr. Napoleon Cacanindin a nangbayabay kadakuada agingga a nagun-od ti panagballigida.
Naammoan a gagem ti nasao nga aktibidad ket tapno maiyam-ammo ti konsepto ti intelligence education, pannakaiyaplikar dagiti teknolohia iti kasapulan dagiti estudiante, panangtalantan kadagiti pannubok iti edukasion kadagiti adda iti nasusulinek a lugar, disadvantaged groups pakairamanan ti panangadaptar iti intercultural ken interdisciplinary collaborations.
Kabayatanna, daytoy ket inorganisar ti Beijing Normal University ken ti UNESCO Institute for Information Technologies in Education.
