LAOAG CITY – Saan a mailadawan ni Ms. Shanarelle Mae Marcos manipud iti Mariano Marcos State University iti napalaos a kinaragsakna kalpasan a nagbalin a Rank 9 ken nakagun-od ti 90.80% iti kalepleppas a November 2024 Philippine Nurses Licensure Examination.
Segun kenkuana, saanna a pulos a ninamnama a makapasa daytoy iti board examination gapu iti kinarigat dagiti linaon iti nasao nga eksaminasion.
Inbatadna a ti nagbalin a dakkel a karit kenkuana kabayatan ti panagrebyuna ket ti problema iti pinansial nangruna ket adayo iti Review Center a pakaisaysayangkatan ti panagrebyuna.
Kunana a dakkel daytoy a balligi para kenkuana gapu ta ubing pay laeng ket arapaapnan ti agbalin a nurse.
Innayonna a maymaysa laeng ti kabsatna ken agtartaraken ti baboy ti pakakumikoman dagiti nagannak kenkuana.
Iti agdama, inpasingkedna nga awan pay ti plano nga agtrabaho iti ballasiw-taaw gapu ta kalikagumna pay laeng ti agserbi iti bukudna a pagilian.
Naammoan a kadagupan iti 145 a nangala ti eksaminasion iti nasao nga unibersidad ket 144 ditoy ket nakapasa idinto a maysa ti saan a nakapasa.
Kabayatanna, malaksid ken ni Marcos ket nagun-od met ni Ms. Mhelanie Dhave Vidad ti Rank 8 nga addaan ti 91.00% idinto a Rank 9 ni Ms. Krizza May Dalire nga addaan ti 90.80%.
Nagun-od ti Mariano Marcos State University ti Rank 6 Performing School iti intero a pagilian nga addaan ti 99.31% a passing rate.
