LAOAG CITY – Naragsak nga inpakaammo ni Vice Mayor Rey Carlos Fariñas a napagbalin a kada tawenen iti pannakaipabarona wenno pannakai-renew ti Memorandum of Agreement iti nagbaetan ti Local Government Unit ditoy siudad ti Laoag ken SM.
Segun kenkuana, daytoy ket kalpasan a nakita ti dakkel a mall ti napintas a resulta iti pannakaisayangkat ti Free Cinema kadagiti Senior Citizens ken Person’s With Disability.
Inbatadna nga iti orihinal a linaon ti Memorandum of Agreement ket agpaut laeng iti las-ud ti innem a bulan ngem gapu iti ad-adda pay a panangpatibker iti nasao a programa ket napagbalin daytoy a maysa a tawenen.
Mainaig iti daytoy, inlawlawag ni Vice Mayor Fariñas nga adda met ti inlungalong ti gobierno probinsial a kalikagumda nga ipalawa ti Free Cinema iti intero a probinsia ti Ilocos Norte.
Nupay kasta, kunana a marigatan ti dakkel a mall a mangakomodar ti dakkel a bilang dagiti mabenepisiaran iti nasao a programa.
Innayonna a basar iti nagbalin a kiddaw ti gobierno probinsial iti SM ket no adda ti bakante pay para iti Free Cinema ket akomodarenda dagiti aggapu iti sabali nga ili wenno siudad ditoy probinsia.
