LAOAG CITY – Balligi ti naisayangkat a panagpinnirma ti Memorandum of Agreement iti nagbaetan ti gobierno lokal ditoy ciudad ti Laoag ken iti Department of Social Welfare and Development – Region I pakaseknan ti Aruga project.
Segun kenni Director Marie Angela Gopalan, ti regional director ti Department of Social Welfare and Development – Region I, ti katulagan ti mangipasimudaag ti panangrugin ti pilot implementation ti nasao a proyekto.
Kunana nga gagem ti nasao a proyekto a tulongan dagiti addaan ti rangkap ti bagi.
Inbatad na a kasapulan dagiti addaan ti rangkap ti bagi ti suporta, saan laeng a manipod iti bukod da a pamilya no di ket pakairamanan ti gobierno.
Inpakaammo na nga umabot ti 2.5-milyon a pilipino ti addaan ti rangkap ti bagi, ken 139 a ribo ti aggapo iti Rehiyon Uno.
Innayon na a manipod iti nasao a bilang ket 3 ribo ti aggapo ditoy ciudad ti Laoag ken 440 kadagitoy ket ubbing.
Inrakurak na a daytoy a sektor ket nakurang ti oportunidad a maipapaay kadakuada kas iti edukasyon, healthcare ken social participation.
Segun kenkuana, babaen ti Project Aruga ket awan ti maibati wenno mailanglangi ken maikkan ti namnama ti tunggal Pilipino.
Mainaig iti daytoy, inbatad ni Undersecretary Eduardo Punay, ti Undersecretary for Innovations and Program Development a rumbeng a maiprayoridad dagiti Persons with Disability aglalo ket isuda ti maibilang kas vulnerable sector gapo ta isuda ket ubbing ken addaan ti special needs
Inpakaammo na nga umabot iti tallo a bulan ti pilot testing ditoy ciudad ken no makita a napintas ti resulta na ket ad-adda pay nga ipalawa da ti masakupan na iti pagilian.
Kabayatanna, inlawlawag ni Jayson Oabel, ti Division chief ti Pilot Implementation Division a babaen iti daytoy a proyekto ket maipaayan da ti disability inclusive, pakairamanan ti disability support allowance a 10 ribo a pisos, Homecare and Community Support Services, Case management and Referral, social services, education services, health services ken livelihood.
Malaksid ditoy ciudad ti Laoag, karaman pay a pakaiyimplementarn ti pilot testing iti ciudad ti Region 6, region 4B, ken Region 11.
