LAOAG CITY – Inpakaammo ni Ms. Pauleen Pascual, ti Immigrant Services Officer II iti Commission on Filipinos Overseas a mangisaysayangkatda ti Pre-Departure Orientation Seminar ken Guidance Counseling Program, Community Education Program ken dadduma pay para kadagiti Pilipino nga immigrants.
Segun kenkuana, naiget ti panang-check dagiti Immigration Officers ti Digital Certificate kadagiti immigrants sakbay a makatalaw dagitoy nga agturong iti ballasiw-taaw.
Inbatadna a daytoy ket maiyallubog iti Batas Pambansa Bilang 79 a napagbalin a naan-anay a linteg idi Hunio 16, 1980 isu nga amin a Pilipino a naikkan ti immigrant visa ket rumbeng dagitoy a mapan agrehistro iti opisinada.
Mainaig iti daytoy, inlawlawag ni Ms. Pauleen Pascual, ti Immigrant Services Officer II iti Commission on Filipinos Overseas a tapno maidanon latta dagiti programada kadagiti maseknan a Pilipino iti baet ti kaadayo iti lugarda ket isuda ti umasideg tapno mangiyuswat ti programa kadakuada.
Kunana nga adda ti maangay a Mobile Pre-Departure Orientation Seminar ken Mobile Guidance Counseling Program iti Laoag City Hall manipod alas siete ti bigat agingga alas singko ti malem inton Marso 15 para kadagiti nagpetision a kabagianda iti ballasiw-taaw ken dagiti Pilipino a nagasawa ti gangganaet.
Mainaig iti daytoy, kinuna ni Mr. Ducusin a manipod idi tawen 1988 agingga 2021 ket adda ti nagrehistro iti opisinada a 243,611 no sadino kadagupan ti nasao a bilang ket kangatoan ti Ilocos Region ti Pangasinan nga adda ti 107,949, maikadua ti Ilocos Norte nga adda ti 66,344, maikatlo ti Ilocos Sur nga adda ti 36,703 ken maudi ti La Union nga adda ti 32,615.
Kabayatanna, naammoan a manipod idi 1988 agingga 2021 ket adda ti nagpetision a 14,766 manipod ditoy siudad ti Laoag idinto nga 8,162 manipod iti ili ti Bacarra.
