LAOAG CITY – Naipakita kadagiti mannalon ti panagoperar ti Mobile Solar-Powered System (MSPS) iti Barangay Casili ditoy ciudad ti Laoag.
Ti Mobile Solar-Powered System ket teknolohia a partuat ti ACT Machineries and Metal Craft Corporation a pagtaudan ti danum babaen ti solar energy.
Segun kenni Engr Shilea Opelac, mangidadaulo iti City Agriculture Office ditoy ciudad, ti Mobile Solar-Powered System ket naidumduma no ikumpara kadagiti immun-unan a solar powered panel a naimuntar iti nasao a barangay gapu ta ti naipakita a teknolohia ket mabalin a maiyakar iti nagduduma a lugar ken mabalin pay a magaraw ti solar panel tapno maipasarang ti direksion iti init.
Kunana a babaen iti nasao a teknolohiya ket makapataud ti 50 Cubic Meters wenno 50,000 liters a danum iti uneg laeng ti maysa nga oras.
Kabayatanna, inpasingked ni Mayor James Bryan Alcid iti panangkita ti gobierno siudad ti wagas a maaddaan ti kastoy a nayon a gamit dagiti mannalon kangrunaan na kadagiti lugar a narigat ti suplay ti danum ita a summer season.
Kuna ti Mayor a daytoy ket dakkel a tulong aglalo ita a sumangsango ti problema ti pagilian gapu iti kinangina t presio ti produkto a petrolyo ken maibilang pay a natalged para iti aglawlaw.
