LAOAG CITY – Patyen ni Fire Sr. Insp. Edison Reyes, municipal fire marshal iti ili ti Bacarra a ti rason a nauram ti maysa a tricycle nga addaan ti sidecar number 1160-55c manipud ditoy siudad ti Laoag, ket iti wiring ti tricycle.
Inlawlawag na a sakbay ti pannakauram ti motorsiklo ti tricycle a maysa a Kawasaki Barako 175cc ket adda ti binusinaan ti driver a ni Rodulfo Reynon ngem dita met a saan a nagsardeng ti busina ti motorsiklo nupay inibbatan na ti switch daytoy.
Kuna na nga inpaigid ni Reynon ti tricycle nga addaan ti pasahero tapno ikkaten ti koneksiyon ti baterya tapno agsardeng ti busina.
Nupay kasta, possible a ti nabayag a panagbusina ti tricycle ti makagapu a nalunag ti wiring na ket possible a nagdekket iti positive ken negative a poon a nagrisak daytoy a bulon nan a nagil-ayab iti paset ti karborador ti motorsiklo.
Mainaig iti daytoy, inbatad ni Reyes nga idi nakadanun da iti kalsada ti Brgy. Buyon iti nasao nga ili, a lugar ti nauram a tricycle ket dakkelen ti apoy gapu ta apektaran nan ti maysa a poon ti mangga.
Kuna na a nagpatulong pay ni Reynon kadagiti tattao iti nasao a lugar ngem napaay da a masebseban ti apoy usar ti daga ken darat gapu ta saan met a mabalin a danum ti pangsebseb da gapu ta gasolinan ti nangrubrub ti apoy.
Inbunannag ni Reyes a modified ti koneksiyon ti tricycle gapu ta ti baterya a naimontar ket para ti lugan nga adayo nga amang a dakdakkel ngem ti baterya para iti motorsiklo.
Inbatad na nga adu pay ti naipan nga accessories ti tricycle banag a nausar iti dakdakkel a baterya.
Innayon ni Reyes a nasurok 100 a ribo a pisos ti balur dagiti nauram, no sadinno a 86 a ribo a pisos ti balur ti motorsiklo idinto ti sidecar ken dagiti accessories a naikapet ket agarup 50 a ribo a pisos.
