LAOAG CITY – Naduktalan ni Sen. Panfilo “Ping” Lacson ti modus operandi dagiti lawmaker-contractors a mabalin a nainayon iti overpricing ken substandard a panangipatungpal kadagiti flood control ken dadduma pay nga infrastructure projects.
Inbatad ni Lacson nga iti babaen ti “passing through” scheme, inkapilitan nga agbayad ti contractor ti lima agingga iti innem a porsiento ti project cost ken panangaramid ti proyekto iti distrito no sadinno a ti contractor ket agpanpanday linteg wenno kabagianna.
Maysa kadagiti dakdakamaten a “shortcut” ni Lacson ket ti panangaramid ti 50 a metro ti dike wenno flood control mitigation project nga imbes a 150 a metro a basar iti project specification.
Kunana a no dadduma ket imbes nga innem a metro ti panangikali ti sheet piles ket tallo laeng a metro ti panangikalida.
Inlawlawagna a maysa ditoy ket ti saan a panangilaok ti graba ken darat iti pundasion ti flood control project.
Inpettengna a ti dakes a mapasamak ket adda dagiti matmatay gapu iti palpak a proyekto.
Kalikagum ni Lacson a makita ti listaan ti Department of Public Works and Highways a flood control projects nga insubmitirna iti Malacañang ken makita no mapatawan ti pannusa dagiti agpanpanday linteg a contractor no adda ti umdas nga ebidensia.
