LAOAG CITY – Agdagup ti uppat a milyon a pisos ti premyo ti Ilocos Norte kas Most Outstanding Province iti 2019 Rice Achievers Award.
Daytoy ti naragsak nga inpakaammo ni Mrs. Norma Lagmag, Provincial Agriculturist.
Segun kenni Lagmay, napadayawan ti PGIN ken ti Provincial Agriculture kas maysa kadagiti Top Ten Rice Achievers iti intero a pagilyan idi Nobyembre 27.
Naammoan a manipod kadagiti 21 a probinya a napili nga agbabalubal, nagpagbalin laeng a 12 nu sadino a karaman ti probinsya nga Ilocos Norte agingga nga isu ti nakaiyalat nasao a pammadayaw.
Inbatadna nga adu dagiti criteria a naglalabanan dagiti nagduduma a probinsya iti intero a pagilyan kas ti kaadda ti ordinansa a mangpasayaat ti industriya ti irik, pannakaipaay ti farm machineries kadagiti mannalon, capital assistance kadagiti mannalon, kooperatiba ken dadduma pay.
Kabayatanna, kalikagum ni Lagmay a makagatang ti lugan nga usaren ti Provincial Agriculture Office ken van a mabalin a pangiluganan kadagiti mannalon, mangngalap nga agatendar kadagiti taripnong, worskshop wenno conferences iti ruar ti probinsya.
Kunana a daytoy ti maikapito a daras a nakaawat ti probinsya ti nasao a pammadayaw.
Maipalagip a sumagmamanon a tawen a karaman ti Ilocos Norte kadagiti sangapulo a probinsia iti intero a pagilian a kaaddoan ti maap-apit nga irik.
Namnamaen ti Provincial Agriculturist a mamentenar ti probinsya daytoy a pammadayaw ken mapapintas ti rice industry.
