LAOAG CITY – Balligi a naarestar ti maysa a lalaki a maibilang a Most Wanted Person a sumangsango iti kaso a panagrames.
Nabigbig ti suspek a ni Josemico Guarino Monteclaro, agtawen iti 59, naasawaan ken agdama nga agnanaed iti Sitio Rosal, Brgy. Quezon, Mainit, Surigao del Norte.
Naarestar ti nasao a suspek babaen kadagiti kameng ti Nueva Era Municipal Police Station nga indauloan ni P/Capt. Randy Laurate ken nakikoordinarda iti Surigao del Norte Police Provincial Office.
Natiliw ti maseknan a suspek babaen iti bileg ti warrant of arrest nga inyetnag ni Judge Melanio Roxas Jr., Acting Presiding Judge ti Regional Trial Court – Branch 18 iti siudad ti Batac no sadinno a naiparuk-at daytoy idi Pebrero iti agdama a tawen gapu iti panaglabsingna iti Republic Act No. 8353 wenno Rape.
Naammoan nga awan ti nairekomendar a pagpiyansa iti nadakamat a suspek.
Kabayatanna, nagtalinaed pay laeng ti suspek iti kustodiar ti Nueva Era Municipal Police Station kabayatan a maisagsagana dagiti dokumento para iti pannakaipila ti kaso kontra kenkuana.
