LAOAG CITY – Nagballigi ti nagtitipon a pwersa ti Ilocos Norte Provincial Intelligence Unit (INPIU), 2nd Ilocos Norte Provincial Mobile Force Company iti panangidaulo ni Police Major JAYSON BATUYONG, kadwa da ti Tantangan-PNP, PIU Sultan Kudarat PPO, PIT-SKRIU12, 45SAC, 43SAC PNP SAF ken Sultan Kudarat PMFC a nangtiliw iti most wanted person ditoy Ilocos Norte.
Daytoy ti kinumpirmaran ni Police Major Jephre Taccad, ti pannakangiwat ti INPPO.
Nabigbig daytoy a ni Ferdinand Balmes Bueco, agtawen ti 56, taga Brgy. Guerrero iti ili ti Dingras ngem natiliw ti akusado idiay Sitio Maharlika, Brgy. Poblacion, Tantangan, South Cotabato.
Natiliw ti akusado babaen ti bileg ti maysa a warrant of arrest a napetsaan ti Setyembre 6, 2017 nga inparuk-at ni Hon. Nida B. Alejandro, Presiding Judge, RTC, First Judicial Region, Branch 12 ditoy ciudad ti Laoag gapu iti kaso na a murder ken awan ti nairekomendar a pagpiyansa na.
Malaksid iti daytoy, karaman pay ni Bueco iti listaan ti DILG Most Wanted Person no sadinno nga adda ti naidiaya a gunguna nga umabot iti 140 ribo a pisos para iti siasinno man a makaitudo ti ayan ti akusado.
Maipalagip a ni Bueco ti primary suspect iti pannakapalto-paltog a poon ti nakatayan ni Brgy Kagawad Abelardo Gamayon Carbonel, agtawen ti 46, naasawaan ken residente iti Barangay Foz iti ili ti Dingras.
Napasamak ti pammaltog iti national highway bisinidad ti Brgy. Guerrero iti ili ti Dingras idi Agosto 16, 2016 ken narekobre iti lugar ti uppat a fired cartridges ti caliber .45 ken maysa a deformed fired bullet.
