LAOAG CITY – Ballaigi a naarestar ti Most Wanted Person ditoy Ilocos Norte iti Brgy. Garnaden iti ili ti Nueva Era.
Nabigbig ti akusado a ni Benjie Tayaoan, agtawen ti 41 ken residente ti Brgy. Daquiaog iti ili ti Marcos ngem agdama nga agnanaed iti Brgy. Poblacion iti ili ti Nueva Era.
Natiliw ti suspek babaen iti nagtipon a puersa ti Provincial Special Enforcement Team nga indauloan ni Police Captain Tolentino Erum ken Nueva Era Municipal Police Station.
Naiparuk-at ti warrant of arrest kontra iti suspek idi Pebrero 5 ita a tawen babaen iti panangipaulog ni Judge Francisco Quilala iti RTC Branch 14 ditoy siudad ti Laoag.
Naglabsing ti suspek iti Law on Firearms and Ammunitions ken narekomendaran daytoy nga agpiyansa ti 80 a ribu a pisos.
Iti agdama, nagtalinaed ti suspek iti kustudiar ti Philippine National Police iti ili ti Nueva Era a manamnama a maidatag ita nga aldaw iti korte a naggapoan ti warrant of arrest.
