LAOAG CITY – Nagballigi dagiti kameng ti Provincial Intelligence Unit iti Ilocos Norte Police Provincial Office (INPPO) a nangtiliw iti maibilang kas Most wanted person ditoy probinsya.
Nabigbig ti akusado a ni Nestor Jacinto, 43, awanan ti asawa, mannalon, taga Brgy. Estancia iti ili ti Piddig ngem agdama nga agnanaed iti Barangay Rizal, Santiago City, Isabela.
Natiliw ti akusado babaen ti bileg ti warrant of arrest gapu iti kaso na nga homicide ken nairekomendar ti 60 ribo a pisos a piyansa na para ti temporaryo a pannakawaya-waya na.
Basar iti report, napan paylaeng naglemmeng ti akusado idiay Isabela idi 2014.
Iti eksklusibo nga interview ti Bombo Radyo Laoag ken ni Jacinto, 20 tawenen ti napalabas sipud napabasol nga adda ti pinaltugan na iti ili ti Badoc.
Inpalgak na a napan nakigapas iti ili ti Badoc ngem iti maysa nga aldaw ket itudo da lattan nga adda ti pinaltugan na iti lugar.
Innayon na a napilitan nga immadayo iti ili ti Badoc gapu ta pinangtaan da a patayen da daytoy ngem inpasingked na nga awan ti kinapudno na ti alegasyon da kenkuana.
