LAOAG CITY – Nagballigi dagiti otoridad a nangtiliw ti maibilang a Most Wanted Person iti ili ti Badoc.
Segun ken ni Police Captain Elison Pasamonte, ti Hepe iti ili ti Badoc, ti akusado ket agtawen ti 32, babai ken residente met aeng iti nadakamat nga ili.
Inbatad ni Pasamonte a natiliw ti akusado iti mismo a pagtaenganda babaen iti bileg ti warrant of arrest gapu iti kasona a panaglabsing iti Republic Act 7610 wenno ti “Special Protection of Children Against Child Abuse, Exploitation and Discrimination Act.”
Iti agdama, nagtalinaed ti akusado iti kustodiar ti Philippine National Police ken maiyur-uray ti panagpiyansana.
Kabayatanna, nagballaag ni Pasamonte kadagiti wanted person iti ili ti Badoc a nasaysayaat a dumatagda laengen iti kuerpo ti pulisia.
