LAOAG CITY – Nagballigi ti nagtitipon a pwersa ti PNP-Banna, CIDG-RFU, NCR, PNP-Nueva Era, ken PIU-INPPO a nangtiliw ti maysa a most wanted person iti ili ti Banna.
Daytoy ti inbatad ni Police Lt. Kester Arellano, ti chief of police iti ili ti Banna.
Binigbig ni Arellano ti akusado a ni Rey Espiritu y Lazaro, agtawen ti 39, naasawaan, taga Barangay Catagtaguen iti ili ti Banna ngem agdama nga agnanaed idiay Barangay Kalayaan, Batasan Hills, Quezon City.
Segun ken ni Arellano, natiliw ni Espiritu babaen ti bileg ti alias warrant of arrest nga inparuk-at ni Hon. Manuel Argel Jr. iti RTC Branch 65 ditoy ciudad ti Laoag a napetsaan ti Enero 3, 2005 gapu iti kaso na nga homicide ken frustrated homicide.
Nairekomendar ti piyansa ni Espiritu nga 64 a ribo a pisos para iti temporaryo a pannakawaya-waya na. Iti agdama, nagtalinaed ni Espiritu iti kustodyar ti PNP iti ili ti Banna.
