LAOAG CITY – Burburtya ti motibo ken dakkel a karit para kadagiti otoridad iti panagimbestigar iti napasamak a pammaltog iti ili ti Sarrat.
Daytoy ti inadmitir iti Bombo Radyo ni Police Major Carlo Abing, chief of police ti PNP-Sarrat.
Segun kenni Abing, dagiti biktima a taga Barangay Lapaz ditoy ciudad ti Laoag ket mapan da kuma agideliver ti ikan iti ili ti Solsona ken nakalugan dagitoy ti elf truck.
Iti imbestigasyon da, bayat nga adda iti C5 dagiti biktima ket napaltogan ti lugan da ken tallo ti nangeg dagitoy a putok ti paltog ngem dua ti timmama iti lugan dagitoy.
Kuna pay ni Abing nga awan ti nakita da a basyo iti nakapasamakan ti pammaltog rason a ti atapen da ket revolver ti nausar a paltog ngem urayen da pay ti imbestigasyon ti SOCO seknan iti armas a nausar.
Inlawlawag na nga awan ti teorya da wenno kitkitaen da pay nga anggulo gapo ta basar kadagiti biktima ket awan met ti nakariri da sakbay ti pammaltog.
Inbatad na a basar pay kadagiti biktima ket nakalugan ti wave honda black dagiti suspek ken naka-jacket dagitoy.
Mainaig iti daytoy, kuna ni Abing a manarimaan ti panangreview da kadagiti CCTV ngem marigatan da pay laeng gapo ta nasipnget pay laeng idi napasamak ti pammaltog.
Immapela met daytoy kadagiti biktima a makitinnulong kadagiti otoridad tapno alisto a masolbar ti napasamak.
