LAOAG CITY – Nagsagaba ti nakana a sugat ti ulo ken ngiwat ti maysa a lalaki kalpasan a naidungpar iti naglugananna a motorsiklo iti concrete barrier iti Brgy. San Agustin iti ili ti Paoay.
Segun ken ni Police Staff Sergeant Joseph Adap, ti Imbestigador iti Philippine National Police iti nasao nga ili, nabigbig ti biktima a ni Erick James Pacol, agtawen ti 26 awanan asawa, maysa a mekaniko ken residente iti nasao a lugar.
Inbatadna a bayat a dumaldalyasat ti nakamotorsiklo nga Honda Wave nga agmaris ti nangisit nga agpa-daya ket kellaat daytoy a napukawan ti kontrol ti manibela a nangitunda ti pannakadesgrasiana.
Inlawlawagna a naggapu iti pasken ti biktima ken napanna pay dinagas ti kasinsinna nga isu ti kinaduana a nagawid ngem saanen a nakadanon gapu iti napasamak nga aksidente.
Kunana a rumrummuar iti imbestigasionda a saan a nakasuot ti helmet ti biktima ken nabartek daytoy idi napasamak ti desgrasia.
Kabayatanna, naammoan a nagtalinaed pay laeng iti Mariano Marcos Memorial Hospital and Medical Center iti siudad ti Batac ti biktima para iti naan-anay a pannakatamingna.
