LAOAG CITY – Natay ti maysa a motorista kalpasan a nadesgrasya iti paset ti Pinili-Nueva Era road iti Barangay Badio idiay Pinili, Ilocos Norte.
Daytoy iti kinumpirmaran ni Police Chief Inspector Antonio Gerardo, ti chief of police iti ili ti Pinili.
Binigbig ni Gerardo ti biktima a ni Arnold Bumanglag, addaan iti umno a tawen ken residente met laeng iti nasao nga ili.
Inlawlawag na a bayat iti panagdaldalyasat ni Bumanglag iti nasao a lugar ket bimmallasiw ti lakay a ni Pasifico Agarano, agtawen ti 71 ken residente met laeng iti nadakamat a lugar.
Gapu iti daytoy, natumban ti motorsiklo a nagsagabaan ni Bumanglag iti sugsugat kangrunaan na iti ulo na idinto nagsagaba met ti sumagmamano a sugat ni Agarano.
Agpada a naitaray iti ospital dagiti dua ngem natay bayat a maag-agasan iti ospital ni Bumanglag.
Rumrumuar a napardas ti panagpataray ni Bumanglag ken awan iti suot na nga helmet idi mapasamak iti insidente.
