LAOAG CITY – Inlawlawag ni PEMS Willie Velasco, ti Highway Patrol Group ditoy Ilocos Norte a maipawil dagiti motorsiklo a saan a maiddep ti additional auxiliary light no naraniag ti lugar nga ayan da ti rabii.
Daytoy ti inpakaammona kalpasan nga inkiddaw ni Sangguniang Panlalawigan Member Gian Carlo Crisostomo iti naan-anay a palawag maipanggep iti pagannurutan a maipawil ti panagusar ti auxiliary led lights kadagiti nalawag a lugar ti rabii.
Kuna ni Velasco a rumbeng nga addaan ti separate switch iti tunggal motorsiklo a mabalinda nga usaren no iddependa ti auxiliary light tapno saan a mapurar dagiti lugan a kasabat da.
Innayon na a daytoy ket wagas tapno maliklikan ti aksidente.
Mainaig iti daytoy, inbatad ni Crisostomo a no kitaen dagiti modelo ti lugan ket maiddep laeng ti silaw no naan-anay a maiddep ti sibubukel a motorsiklo.
Segun ken ni Velasco, no ibasar daytoy iti pagannurutan nga inyetnag ti Department of Transportation, daytoy ket maibilang nga maipawil a rason nga imanmandarda dagiti motorista nga agikabil nga inkapilitan ti separate switch-da.
Innayonna a no matiliw dagitoy a saan a sumurot ti nasao a pagalagadan ket mapatawanda ti multa nga aggatad ti lima a ribu a pisos ken makumpiskar ti motorsiklo ken maikabil ti kustodiar dagiti awtoridad agingga a maiplastar a mapasayaat t panakaikabit ti nasao nga auxiliary light.
Kunana a ti pannusa ket mabayadan iti Land Transportation Office.
