LAOAG CITY – Natay ti driver ti motorsiklo iti panagdinnungparda iti nakabisikleta iti Brgy. 14, San Gregorio iti ili ti San Nicolas.
Segun ken ni P/Capt. Randy Damo, Hepe ti San Nicolas Municipal Police Station, nabigbig ti biktima a ni Melvin Aquino, agtawen ti 44 ken residente ti Brgy. Nagbacalan iti ili ti Paoay idinto a nabigbig met ti nangiturong ti bisikleta a ni Gener Barrayuga y Miguel, agtawen ti 60, naasawaan ken residente ti Brgy. Raraburan ditoy siudad ti Laoag.
Inbatadna a basar iti inwayatda nga imbestigasion, kabayatan a dumaldalyasat ti nakabisikleta nga agturong nga agpa-daya ket kellaat nga immagaw ti linya iti kalsada ti nakamotorsiklo a nangitunda ti panagdinnungparda.
Gapu iti daytoy, kuna ni P/Capt. Damo a nagsagaba ti sugat iti akinkannigid a luppo ti nakabisikleta idinto a nagsagaba met ti nakana a sugat ti nakamotorsiklo kangrunaanna iti ulo ken rupana a naitaray iti Mariano Marcos Memorial Hospital and Medical Center iti siudad ti Batac.
Inlawlawagna a napagnunumoan dagiti agsumbangir a partido a saanen a mangipila ti reklamo ti pamilia ti biktima ngem tumulong iti paggastoanda agingga a maitabon daytoy.
Innayonna a saan a nabartek ti biktima ngem saan a nakasuot ti protective helmet idi napasamak ti desgrasia.
