LAOAG CITY – Natay ti driver ti motorsiklo kalpasan ti panagdinnungparda iti maysa a bus iti Brgy. 22, San Guillermo iti ili ti San Nicolas.
Segun ken ni Police Major Eduardo Santos, ti Hepe ti Philippine National Police iti nasao nga ili, nabigbig ti driver ti Florida bus a ni Nonie Agcaoili y Calaramo, agtawen ti 57, naasawaan ken residente ti Brgy. 23, Dipilat iti ili ti Vintar idinto a nabigbig met ti nangiturong ti Suzuki Raider Fi a ni John Michael Tapac y Paguibitan, agtawen ti 22, awanan asawa, estudiante ken residente ti Brgy. 17, Tabug iti siudad ti Batac.
Inbatadna a basar iti insayangkatda nga imbestigasion ket kabayatan a dumaldalyasat ti pampasahero a bus nga agturong nga agpaamianan ket kellaat nga immagaw ti linya ti nakamotorsiklo.
Gapu iti daytoy, kunana a naipasirok ti driver ti motorsiklo ken nagsagaba ti nakana a sugat iti ulo ken bagina idinto a saan met a naan-ano ti driver ti bus.
Inlawlawagna a dagus a naitaray iti Mariano Marcos Memorial Hospital and Medical Center iti siudad ti Batac ti driver ti motorsiklo ngem naideklara a dead on arrival babaen ken ni Dr. Dominiel Denver Ganal.
Innayonna a saan a nakasuot ti helmet ken reflectorized vest ti biktima idi napasamak ti aksidente.
Kabayatanna, inpakaammo ni Mr. Elmer Tapac, ama ti pimmusay a nakamotorsiklo a nagkiddaw daytoy ti tulong-pinansial iti bus driver.
Iti agdama, manarimaan pay laeng ti pannakaiproseso ti pannakaipila ti kaso kontra iti driver ti pampasahero a bus.
