LAOAG CITY – Dead on arrival ti maysa a pulis kalpasan ti pannakaidungpar ti naglugananna a motorsiklo iti maysa a close van iti Manila North Road iti Brgy. 14, Bungon iti siudad ti Batac.
Nabigbig ti biktima a nangiturong ti motorsiklo a Yamaha Aerox 155 nga agmaris ti nangisit nga agtawen iti 29, addaan ti live in partner, Philippine National Police personnel ti Batac City Police Station ken residente ti Brgy. Ayusan Norte, Vigan City, Ilocos Sur.
Nabigbig met ti driver ti Isuzu Forward Close Van nga agtawen iti 36, awanan asawa ken residente ti Brgy. 55-A Barit ditoy siudad ti Laoag.
Basar iti Batac City Police Station, kabayatan a dumaldalyasat ti nakamotorsiklo nga agpa-amianan ket kellaat a dimmungpar ti close van nga agturong nga agpa-abagatan no sadinno nga immagaw ti linya iti kalsada ti van a nangitunda ti panagdinnungparda.
Gapu iti daytoy, nagsagaba ti nakana a sugat iti ulo ti driver ti motorsiklo a dagus a naitaray iti Mariano Marcos Memorial Hospital and Medical Center iti siudad ti Batac ngem naideklara a dead on arrival babaen iti Attending Physician idinto a saan met a naan-ano ti nangiturong ti close van.
Kabayatanna, naammoan a gapu iti kinapigsa ti impact ti desgrasia ket nauram ti nagluganan ti pulis a motorsiklo.
