LAOAG CITY – Nasugatan ti driver ti motorsiklo kalpasan a nakadinnungpar na ti maysa a kotse iti paset ti Batac-Banna road a bisinidad ti Brgy. San Mateo iti ciudad ti Batac.
Nabigbig ti driver ti Honda Mobilio a ni Rolando Comahig y Fermin, 42, naasawaan ken dagiti kadwa na a da Alicia Galut, Glory Galut ken Maricel Galut, agpapada a residente iti Brgy. #5 Nagpatayan iti ili a Banna idinto a ti driver ti Honda Wave 125 ket ni Eduardo Batalla y Mangoma, 42, awanan asawa, security guard ken residente iti Brgy # 23 Biningan iti ciudad ti Batac.
Basar iti imbestigasyon, bayat nga agpapalaud a direksyon ti kotse iti nasao a kalsada ket dita a kellaat a nakadinnungpar na ti motorsiklo a naggapo iti maysa a barangay road apaman nga aglasat daytoy iti Batac-Banna road.
Gapu iti dayta, nagsagaba iti sugat ti rupa ken ima ti driver ti motorsiklo idinto a saan met a naan-ano dagiti naglugan ti kotse.
Naamoan nga awan iti suot a helmet ti nakamotorsiklo.
Pinaigetan ti PNP Batac iti checkpoint tapno bumaba iti bilang ti desgrasya iti nasao a lugar.
